दशैंमा नयाँ नोट पहिले जसरी नबाँड्ने : राष्ट्र बैंक


२१ असोज, काठमाडौं ।नेपाल राष्ट्र बैंकले यस वर्ष विगतको जसरी दशैं अगाडि नयाँ नोट बाँड्न नसकिने बताएको छ ।

नयाँ नोट स्टकमा रहेको भए पनि विगतको जस्तै लाइन लगाएर दिने सम्भावना कम रहेको राष्ट्र बैंकका प्रवक्ता डा. गुणाकर भट्टले बताए ।

कोभिड–१९ को जोखिम दिनप्रतिदिन बढिरहेको अवस्थामा विगतको जस्तो राष्ट्र बैंकमै बोलाएर लाइन लगाएर वितरण गर्दा कोरोना सर्ने जोखिम हुने भएकाले नयाँ विकल्प सोचिने प्रवक्ता भट्टले बताए ।

बैंकहरुलाई भने राष्ट्र बैंकले नयाँ नोट उपलब्ध गराउने उनले जानकारी दिए । ‘कोरोनाको कारण विगतको जसरी बाँड्ने सम्भावना कम छ, सम्भवतः बैंकहरुले पनि विगतको जसरी बाँड्दैनन् होला,’ उनले भने, ‘नयाँ नोट दिने भन्ने कुरा त हो तर कुन विधि अपनाएर वितरण गर्ने भन्ने निर्णय हुन बाँकी नै छ ।’

दशैंको दक्षिणा दिनका लागि नयाँ नोट वितरण गर्ने चलन चल्दै आएको छ । विगतमा राति उज्यालो नहुँदै सर्वसाधारणहरु नयाँ नोट साट्नका लागि राष्ट्र बैंकको कार्यालय अगाडि गएर लाइन लाग्ने गर्दथे ।

दशैंमा नयाँ नोट वितरण गर्दा नोटको आयु घटेको भन्दै राष्ट्र बैंकले दशैंबाहेकका अन्य चाडपर्वहरुमा पनि वितरण गर्ने गरेको छ । तर सर्वसाधारणले भने नयाँ नोट लिन दशैं नै कुर्ने गरेका छन् ।

फेसबुकबाट तपाईको प्रतिक्रिया