अक्टुबर १५ तारिखबाट भारतमा हल खुल्ने !

 १५ असोज,नयाँ दिल्ली । कोरोनाका कारण ६ महिना देखि भारतका सम्पूर्ण चलचित्र भवनहरु बन्द भएपछि धेरै चलचित्रका निर्माताले डिजिटल प्लेटफर्मबाट चलचित्र रिलिज गरे । तर केही चलचित्र भने हल खुल्ने प्रतिक्षामा छन् ।

भारतको केन्द्रिय सरकारले अनलक–५ गाइडलाइन बुधबार सार्वजनिक गरेको छ । जस अन्तर्गत अक्टुबर १५ तारिखबाट भारतमा हल खोल्नका लागि अनुमति दिइएको छ ।

प्रदर्शकले हलको क्षमताको ५० प्रतिशत दर्शक राखेर हल खोल्न पाउनेछन् । यसका लागि केन्द्रिय सरकारले एसओपी सार्वजनिक गर्ने बताएको छ ।

भारतमा दैनिक ९० हजार कोरोना संक्रमित देखिएपनि केन्द्रिय सरकारले ६ महिनापछि हल खोल्ने निर्णय गरेको हो । यसलाई भारतका प्रदर्शकहरुले स्वागत गरेका छन् । यस्तै, बलिउडका कलाकारहरुले पनि यो खबरले उत्साहित भएको उल्लेख गरेका छन् ।

फेसबुकबाट तपाईको प्रतिक्रिया