अमेरिकामा कोरोनाका कारण मर्नेको सङ्ख्या २ लाख नाघ्यो

काठमाडौं । कोरोनाका कारण अमेरिकामा मर्नेहरुको सङ्ख्या मंगलबार २ लाख नाघेको छ ।

विश्वमा संक्रमणको सबैभन्दा धेरै संख्या अमेरिकामा रहेको छ।जोन्स हप्किन्स विश्वविद्यालयका अनुसार अमेरिकामा संक्रमित संख्या ६८ लाख बढी भइसकेको छ।

मार्च महिनामा अमेरिकी राष्ट्रपति डोनाल्ड ट्रम्पले देशमा कोरोनाका कारण हुने मृत्यु एक देखि दुई लाखकोबीचमा रहेमा देशले कोरोनाविरूद्धको लडाईंमा राम्रो काम गरेको देखाउने बताएका थिए। ट्रम्पले योसँगै आफ्नो हस्तक्षेपका कारण मृतक संख्या कम भएको दाबी गरेका थिए।

तर मृतक संख्या दुई लाख नाघेसँगै कोरोना नियन्त्रणलाई लिएर महामारीको सुरूदेखि नै सोको व्यवस्थापनका लागि आलोचना खेप्दै आएका ट्रम्पका लागि मृतकको यो संख्याले उनले राम्रो काम गर्न नसकेको देखाएको छ।मृतक संख्या २ लाखमा सिमित गर्ने दाबी ट्रम्पले गर्दै आएको भएपनि कोरोना रोकथाममा ट्रम्प प्रशासनले बनाएको टास्क फोर्सका प्रमुख डा. एन्थोनी फाउचीले भने कोरोनाका कारण २ लाख ४० हजार मानिसको मृत्यु हुने बताउँदै आएका थिए।

विज्ञहरूले भने सामाजिक दूरी र मास्क प्रयोगमा अमेरिकी जनतामा देखिएको उदासिनताले मृत्यु संख्या अनुमान गरिएभन्दा धेरै हुने बताउँदै आइरहेका छन्।

यस्तै युनिभर्सिटीको वासिङ्टनको स्वास्थ्य इन्सिट्यूटले वर्षको अन्त्यसम्म कोरोनाका कारण हुने मृत्यु ३ लाख ७८ हजार पुग्ने अनुमान गरेको छ। उसले संक्रमणका कारण डिसेम्बरमा दैनिक ३ हजार जनासम्मको ज्यान जानसक्ने जनाएको छ।

हालैका दिनहरूमा नर्थ डकोटा, युटा, विन्सकन्सिन लगायतका अमेरिकी राज्यहरूमा संक्रमित संख्यामा तीब्र वृद्धि देखिएको छ।

अमेरिकामा जनवरीमा पहिलोपटक कोरोना संक्रमित फेला परेका थिए।

फेसबुकबाट तपाईको प्रतिक्रिया